اهلا باحبابي
وشراكم مع رمضان؟ إن شاء الله تكونو انتيك
حبيت ليوم نحكي على وحد الموضوع هكدا اللي هو
الميساجات اللي تتبعث ولا توصل بالغالط
انا مالفة تصرالي مي لقيت قصص لاشخاص بعثو ميساجات للأشخاص الغالطين
ولا وصلوهم ميساجات بالغلط
رايحة نحكي عليهم لكن توعدوني تشاركوني بقصص مثلها صراتلكم ليكم
القصة الأولى
هادو مجموعة بنات كانوا في الجامعة وكانت وحده منهم عارضتهم ، جات وحده مالبنات كتبت
لمولاة العرضة (اذا راكي عارضة نجلاء انا مراحش نجي ودبريلي اي عذر قوليه
للبنات، بصراحه دمها ثقيل واذا عرضتيني مرة اخرى متعرضيهاش ونوعدك نجي اوكي) وبعثت الميساج لنجلاء !! .....
القصة الثانية
تحكي وحدة قالت:
مره كنت نكتب في مساج لزميلتي فالخدمة قلتلها فيه تحسب لي طارئ فالخدمة باسك
منيش حابة نروح نخدم المهم انا حافظة رقم زميلتي بصح كتبتو غالط وشوية يعيطلي
النيمرو ، استغربت انو خرج نيمرو تعها بلا ميخرج اسمها وريبونديت لقيتو واحد قالي
( بركاي بلا تمهبيل نوضي البسي وامشي تخدمي ) طبعا انا تشوكيت وكوبيت عليه بصح مالخوف رحت نخدم
القصة الثالثة
وحده كانوا تع دارهم عارضينها هي وزوجها، ولسوء الحظ زوجها خرج مع خوه وما
حضرش، هي قعدت ترقعلو عند باباها قالتلواو عرضو عمو للعشاء وكتبت ميساج
لزوجها "اسمع تع دارنا ام سقساو عليك واني كذبت عليهم وقلتلهم بلي عرضك
عمك" ... وبعثت الميساج لباباها
القصة الرابعة
تحكي وحدة تقول:
مره كنت والدة فالمستشفى ووحده من صحاباتي الله يهديها قاعدة مالظهر عندي، كي
وصلت الخمسة تع لعشية مليت منها وهي ماعندهاش الدهشة قاعدة تتوانس مع امي وخواتاتي، عيطلي زوجي قالي شوي ونفوت عليكم وهاذيك ماعندهاش نية تروح ،
رحت انا كتبت مساج لوحدة من خواتاتي قلتلها " انا زوجي اوجاي وهاد اللصقة
عجبتها القعدة وراني مليت منها الله يصلحها ظاهرتلي أي حابة تتسحر عندنا متحكيوش
معاها باش تفهم روحها وتمل وتروح يعطيها ان شاء الله ضربة" وبعثت الميساج
لصحبتي
القصة الخامسة
تقول احداهن:
بعثت لجارتي وقلتلها تجيني بعد المغرب تتقهوى عندي وأنا موالفة نبعثلها وهي تجي
وخلاص يعني مش لازم تريبودي عليا ..وانا بعدما صليت المغرب وجدت روحي
وقهوتي وقعدت نسنى في زوجي يخرج بويسك هدا وقت لي ييخرج فيه
نلقاه جى وقعد وقالي ويني القهوه ؟: أنا : وشمن قهوه ؟ هو : تتمهبلي؟"؟ او نعرفك
تع مفاجآت ؟ حتى مبعد استوعبت اني بعثتلو الميساج ليه بالغلط وسكت وما قلت والو
القصة السادسة
تقول مولات الحكاية:
قبل رمضان بيوم جاني مساج من صحبتي مضمونو ( رمضان غدوة والشياطن تتقيد في
رمضان ... والله راح نتوحشك ) عجبني الميساج قلت والله نبعثو لراجلي .. وبعثتو ..
ولما جاتني accusé de réception لقيت اسم شيخي (أب راجلي) .......... تبهديلة
القصة السابعة
كنت ضيفة عند دار بابا وقالوالي خلي زوجك يجي يتغدى عندنا .. رحت بعثتلو ميساج
" راك معروض عند تع دارنا للغدا" وراح الميساج.. ومبعد شويه يبعثلي اخو زوجي
ميساج مضمونو ( وش هي المناسبة ؟) فشلت
طبعا صاحبة القصة هي اللي فشلت مشي انا هههههههه
القصة الثامنة
تحكي الأخت:
مره تعاركت انا وراجلي كتبت ميساج لختي نسب في زوجي ونقولها اني رح نحقرو
ومنزيدش ندير عليه تتتتخيلوا ...... الميساج راح ديراكت لراجلي وزعف وبعثلي
تهديد وانا قفلت فمي وسكتت والله موقف مننساهش
القصة التاسعة
تروي :
انا مره عيطت لوحدة ماهزتش مبعد شوية جاني منها مساج كاتبة فيه
"يا فلانة .. راهي فلانة (اللي هي أنا) كرهتلي حياتي بالعياط واني مريبونديتش عليها"
والمشكله اني عيطتلها مرة وحدة برك ..
تحسبوني سكت ؟؟ بعثتلها مساج قلت:
"ربي كي يحب يفضحك"
القصة العاشرة
تحكي المخلوقة تقول:
جاني مساج من رقم معرفتوش مضمونو:
" مبروك ماجبتيلنا تتربى في عزكم ورانا فرحنالك ودعينالك ولبنتك ربي يخليهالك ورانا جايينك غدوا"
ديراكت رديت قلت :
" راكي غالطة وقولو للمراة بلي راكم جايين عندها باسك الميساج هدا او موصلهاش"
القصة الحادية عشر والأخيرة
يحكي فلان يقول:
انا مره واحد بعثلي مساج بالغالط :
"فلان راك فاطن ولا راقد " رديتلو : راك غالط
رد :بركا بلا تمهبيل.. كي تجي جيب معاك غداء
هيا نستنى ردودكم ومتحرموناش من مشاركاتكم الفعالة
[i][b]
الأربعاء فبراير 21, 2024 7:03 pm من طرف شيماء أسامة 272
موضوع: les msgs 
